Os legumes son o alimento de orixe vexetal máis rico en proteínas. Aportan unha gran cantidade de fibra alimentaria que axuda a neutralizar a asimilación da glicosa evitando os picos glicémicos, fortalecen o corazón grazas aos fitoesteroles que conteñen, teñen efecto prebiótico e non conteñen graxas saturadas entre outros moitos beneficios. O Amaranto e a Quinoa son dous pseudocereais dado que botanicamente son legumes, pero nutricionalmente aseméllanse máis aos cereais.
A excepción da soia, aos legumes fáltalles o aminoácido metionina e aos cereais o aminoacido lisina. Así, combinando unha de cada grupo teremos un prato de gran valor nutricional e asequible aos nosos petos. É conveniente polas a remollo para neutralizar certos oligosacáridos e taninos que producen gases e dificultan a dixestión, así como para acurtar o tempo de cocción e minimizar a perda de nutrientes. A auga de remollo podemos utilizala para regar as prantas ou limpar o inodoro, pero non para cociñar.
  • Azuki: é a soia vermella máis pequena que unha faba común. É moi rica en Vitamina B1 que axuda a estimular o funcionamento dos riles e do fígado. Respecto do seu contido en minerais, presenta boas cantidades de Calcio, Ferro e Fósforo. Ten un lixeiro efecto relaxante.
  • Fabas: as variedades máis comercializadas son as brancas, pintas e moteadas. Calquera delas resulta moi agradable ao paladar. As fabas secas perden case toda a súa Vitamina C, pero conservan unha gran cantidade de Calcio e Ferro. As persoas que padecen gota ou diabete deben inxerilas con moderación.
  • Garavanzos: de cor branquecina ou amarela moi pálida. Destaca o seu contido en Ferro e Magnesio.
  • Lentellas: ao igual que as fabas, atopamos diversas variedades como as coral (atractiva cor salmón), as pardiñas, as verdes e a continental, a máis grande e máis coñecida de todas. Dado o seu alto contido en Ferro e fibra, son moi aconsellables en estados anémicos e problemas de tránsito intestinal. Tamén conteñen apreciables cantidades de vitaminas B5 (redución do colesterol, niveis de estrés e migrañas), B6 (prevención de afeccións cardiovasculares e diabete) e Potasio (problemas circulatorios e insuficiencia renal). As lentellas son un dos mellores alimentos equilibradores do PH.
  • Mungo: é a soia verde e tamén máis pequena que unha faba común. Resalta o seu contido en Vitamina B1 e minerais como o Cobre, Fósforo e Magnesio. É un dos legumes máis dixestivos.
  • Soia amarela: é a variedade máis coñecida e comercializada. Moi rica en antioxidantes, fibra e Vitaminas hidrosolubles.

Ana Sánchez -Naturópata, Osteópata-